Týsdagin 10. apríl høvdu næmingarnir í 4.-7. flokki vitjan av Listaleypinum. Tað vóru Dánjal á Neystabø og bólkur hansara, sum vóru og høvdu konsert í skúlanum.

7. flokkur hevði arbeitt við tónleikinum hjá Dánjali og bólki áðrenn vitjanina, og tað úrslitið, videoupptøkur og plansjur, varð nýtt í sjálvari framførsluni hjá teimum. Meðan teir sungu, sóu vit film hjá 7. flokki á stórskíggja, og plansjurnar vórðu sendar millum áhoyrararnar.

Bólkurin er samansettur av fólki úr Føroyum, Danmark, Noregi og Finlandi, og teir spæla øll møgulig ljóðføri.

Hetta var ein framúr livandi konsert. Næmingarnir vóru sera áhugaðir og livdu seg inn í framførsluna, sum bæði var orkumikil, stuttlig og kensluborin. Dánjal segði frá um sangirnar, áðrenn teir spældu teir, og teir dugdu sera væl at fáa áhoyrararnar við í framførsluna.

Ein sera góð konsert, sum næmingar og lærarar fara at minnast afturá við gleði.

Fleiri myndir frá konsertini síggjast her!