Hey tit :) Haldi, at vit fara at royna hetta komandi týsdag, um veðrið er til tað. So...... ílætin eftir veðrinum :) Vh PH Føroya Fuglafrøðifelag vil fegin bjóða skúlabørnum og barnagarðsbørnum at taka lut í okkara fuglabingo týsdagin tann 20. apríl frá kl. 10.00-10.30. Tiltakið Fuglabingo var á fyrsta sinni tann 2. Apríl 2020. Fólk tóku væl ímóti tiltakinum, og tí hava vit gjørt av at royna aftur í ár. Hesuferð ynskja vit tó at røkka enn fleiri føroyingum, og vilja tí bjóða skúlum og dagstovnum at taka lut. Fuglafrøði – bæði gleði og fróðskapur Ofta hava vit lyndi til at taka náttúruna, sum finst beint uttanfyri vindeygað, fyri givið. Vit geva ikki starunum, spurvunum ella bládúgvunum ans. Ein avbjóðing, sum merkist um allan heim, er, at frástøðan millum okkum menniskju og náttúruna gerst størri og størri. Føroya Fuglafrøðifelag hevur sum aðalmál at virka til frama fyri fuglalívi og náttúruna í Føroyum. Eitt tað týdningarmesta átakið, ið vit kunnu gera í royndini at verja fugl og náttúru í Føroyum, er at tryggja, at fleiri føroyingar hava størri kunnleika og hegni til at fylgja við tí, sum fyriferst í náttúruni. Serliga týdningarmikið at virka fyri er, at børn og ung fáa ein kennskap til náttúruna í Føroyum. Í Fuglafrøðifelagnum hava vit tí altíð samlast um gleðina at kenna og hyggja at fuglum. Fólkslig frøði - Fuglabingo Hugskotið handan ‘Fuglabingo’ er rættiliga einfalt: fólk setast við eitt vindeyga ella ganga ein túr uppá ein hálvan tíma og telja so allan tann fuglin, ið tey síggja í hesum tíðarskeiði. Tað besta er, at so at siga øll kunnu taka lut í hesi teljingini! Í fjør tóku fleiri enn 300 fólk um alt landið lut í teljingini, og túsundir av starum, spurvum og øðrum fuglum vóru sostatt skrásettir hetta lítla tíðarskeiði á várinum 2020. Í ár vilja vit gera tað enn betur, og vóna at tit ynskja at taka lut í hesum saman við okkum ???? Vegleiðing til Fuglabingo umframt fuglatalvur við myndum av øllum vanligu fuglasløgunum eru at finna á heimasíðuni hjá Fuglafrøðifelagnum www.fuglar.fo/fuglabingo Við grønum kvøðum, Føroya Fuglafrøðifelag