Tofta skúli

Flokkar

Góðu foreldur 27. mars 2020

Endiliga vikuskiftið - hart tiltrongt hjá øllum - bæði næmingum og foreldrum.

Tað var veldugt at kunna tosa við næmingarnar í 6. flokki í morgun. Nú longdist mær eftir at hoyra málið í teimum. Eg haldi, at tey sótu spent og bíðaðu, inntil eg ringdi. Tá ið eg hevði tosað við nærum allar genturnar, riggaði ongin telefon her í húsinum. Onkur segði mær, at HEY hevði sagt, at okkurt var galið hjá teimum. Men tíanbetur riggaði alt aftur aftaná 30 min, og eg kundi ringja til teirra, sum eg ikki hevði tosað við.

Tað virkar sum um, at næmingarnir eru væl nøgdir og væl fyri. Tey allarflestur søgdu, at tey dugdu betur at skipa skúlatingini hesa vikuna, og at tey høvdu gjørt tað, sum tey høvdu fyri. Tað er flott.

So stórt rós til tykkum foreldur.

Takk fyri, at tit stuðla og eggja tykkara barni hesar dagar, tey sita og stríðast við heimaarbeiði. Eg veit væl, at tað ikki altíð er so lætt at fáa gerandisdagin at hanga saman. Tit hava eisini onnur ting á skránni so sum arbeiði, børn, hús og heim. Tað hevði verið stuttligt at hoyrt frá tykkara síðu - tvs at fingið ein stíl frá tykkum um vikuna, ið fór, men tað skal eg spara tykkum fyri :-) .

Nú vóna vit bara, at hetta skjótt fær ein enda. Vit frætta um tað seinni.

Eg vil til seinast ynskja tykkum eitt gott og tiltrongt vikuskifti. Nú sleppa tit at slappa av. Eingin skúlating.

Annelisa

UNI-login á Clio.

Tá tit rita inn á my.clio.me, verða tit spurd um at broyta tykkara loyniorð. Gera tit hetta, er tað sera umráðandi, at tit skriva tykkum nýggja loyniorðið niður.

Heyhey tit.

Eg fari út á skúlan at leggja tykkum allar bøkurnar fram. Hetta verður bæði Pit Stop bøkurnar og Náttúra og tøki bókin. So tað gerst lættari hjá tykkum at arbeiða.

Bøkurnar eru klárar at heinta.Tær liggja í durinum

Vh Annemie

Her er ein stuttur filmur, um hvussu tit koma inn á teams.

https://www.youtube.com/watch?v=O-cNhhgMNzA&feature=youtu.be

Mánadagur

6. apríl

Páskafrí

Juhuuuuu - eingin skúlating

Týsdagur

7. apríl

Páskafrí

Mikudagur

8. apríl

Páskafrí

Hósdagur

9. apríl

Páskafrí

Fríggjadagur

10. apríl

Páskafrí

Góðu foreldur! Fríggjadagur 20. mars 2020
So er fyrsta vikan av. Vónandi eru øll komin nøkulunda ígjøgnum.

Okkum lærarum er álagt at geva næmingunum skúlating fyri og at fylgja upp uppá, at tey vera gjørd. Hetta letur seg væl gera, tá ið tað er okkurt, sum skal latast inn. Verri er, tá ið talan er um at tey sjálvi sita og arbeiða. Tá er talan um álit.

Tað er sera umráðandi at øll arbeiða við skúlatingunum, sum tey hava fingið. Lærarar seta tað í vikuætlanina, sum teir rokna við at klára til tann tíman, sum stendur á tímatlavuni. Fyri tey allarflestu tekur hetta næstan onga tíð. Fyri onnur tekur tað langa tíð at koma ígjøgnum. Tað er ikki meiningin, at man situr allan dagin við skúlatingum, men man leypur heldur ikki uppum, har garðurin er lægstur.

Næmingarnir eiga at duga at sita við nógvum uppgávum sjálvir og teimum nýtast ikki at bíða til foreldrini koma heim úr arbeiði.

SO mítt ráð er, at tit skipa dagin saman við tykkara børnum. Geva teimum eina góða byrjan upp á dagin við morgunmati og so eru tað skúlating á skránni. Her er tað ymiskt, hvussu hvørt barnið er. Her heima havi eg 2 skúladreingir, sum eru bráðir sum mamman; tá riggar hendan skipanin best: Teir koma upp kl 9. 30, eta morgunmat og gera seg kláran til dagin. Sita so frá kl 10 - 12.30 við skúlatingum. Og so er tað frí fyri rest - spæl og hugni - vøllur - trambolin og alt møguligt annað (skermur).

Um so er, at onkur als ikki megnar tær settu uppgávurnar, eru tit vælkomin at ringja til mín, so finna vit eina loysn.

Gott vikuskifti

Annelisa 749450

So er skúlin stongdur frá mánadegnum 16. mars. Fyribils í 2 vikur.

Ímeðan skúlin er stongdur, arbeiða lærararnir heimanífrá, tað gera næmingarnir eisini, í tann mun tað letur seg gera. Tí skulu øll fylgja væl við á heimasetninginum hvønn dag, har boð koma um arbeiðsuppgávur at loysa.

Kunning kemur so hvørt vit vita meira.

Annelisa tlf 749450

Føroyskt:

Tit hyggja hvønn dag eftir, hvat tit skulu gera. Venjið tykkum at arbeiða og halda fríkorter, tit meta sjálvi um, hvat hóskar best til tykkara. Haldið skil á pappírunum, sum tit hava fingið, leggið tey í eina mappu. Til hvønn dag stendur okkurt at gera, soleiðis sum tímarnir vanliga liggja. Tit hava fingið 2 bøkur við heim at lesa. Tit byrja við bókini: Skip í eygsjón. Tey, sum vilja lurta, kunnu fara inn á office, har eg havi sent tykkum teldupost við ljóðfíli. Eisini havi eg upprætta ein ljóðfíl í tí, sum eitur Teams. Inni undir Filer liggja 4 fløgur, har teksturin verður lisin upp. Tá ið tit eru liðug at lesa hana, fara tit í holt við hina. Tit senda mær eitt bókaummæli, tá ið bókin er liðug. Bókaummælið liggur á teams, takið tað niður (downloadið tað og goymið arkið, og so senda tit mær tað aftur. Bókaummælið liggur undir føroyskt og so filer. Um okkurt er, sum tit ikki skilja, kunnu tit altíð ringja ella senda ein teldupost: annelisa.rasmussen@skulin.fo

Rokning!

Nú skúlin er stongdur vegna Covid-19, skalt tú arbeiða við rokning heima. Tú skalt fara inn á heimasíðuna emat.dk. Hetta gjørdi tú ofta í 5.flokki.

Mannagongdin er henda: Far inn á emat.dk og trýst á bláa knøttin "UDEN UNILOGIN". Skriva síðani títt brúkaranavn og loyniorð og trýst á bláa knøttin "LOG IND".

Trýst síðani á "Vis sendte træningsopgaver", sum er ovast til høgru, og so er klárt at fara í gongd við uppgávusettið, sum tú hevur fingið sendandi.

Ætlanin er, at tit í 6.flokki fáa 4 uppgávusett um vikuna, sum tit skulu rokna. Sigast skal, at eg sum lærari síggi tykkara uppgávusvar. Tað fyrsta uppgávusettið skal vera roknað í seinasta lagi mánadagin 16.mars, tað næsta í seinasta lagi týsdagin 17.mars o.s.fr.

Sigast skal, at eg sum lærari síggi tykkara uppgávusvar.

Til ber at fáa hjálp til tær ymisku uppgávurnar við at trýsta á tann grøna knøttin í vinstru síðu "opgavehjælp".

Er tað onkur, sum hevur gloymt sítt brúkaranavn ella loyniorð til emat.dk, ella hevur aðrar spurningar, so eru tit vælkomin at ringja til mín!

Olaf Magnussen 56 50 15