Hósdagin 12. sept. kl. 11. fingu vit í Tofta skúla vitjan av Djóna Nolsøe Joensen, landsstýrismanni í barna- og útbúgvingarmálum, og av Poul Gert Hansen, aðalstjóra.

Talan var um eina órformella vitjan, hvar ið landsstýrismaðurin ynskti at koma á tal við bæði starvsfólk og næmingar.

Vitjanin byrjaði við at Durita Jakobsen, skúlastjóri, bjóðaði landstýrismanninum og aðalstjóranum vælkomnum. Síðani høvdu vit eina stutta sangløtu í sangstovuni, har allir næmingarnir sungu nakrar sangir saman, við hjálp frá nøkrum næmingum, ið sungu fyri og spældu á ymisk ljóðføri.

Eftir sangløtuna fingu gestirnir ein kaffimunn niðri í miðgongini, har teir eisini fingu høvi til at tosa við næmingaráðið í Tofta skúla um, hvat ið næmingaráðið arbeiðir við í okkara skúla.

Meðan landsstýrismaðurin og aðalstjórin vitjaðu, so fingu teir høvi til at síggja ymist, sum okkara næmingar gera í skúlaárinum. Spæliliðið var saman við 3. flokki inni í høllini og spældi ymisk spøl. 6. flokkur er vinaflokkur við 1. flokk, og hesir báðir flokkarnir vóru úti í skúlagarðinum og spældu saman.

Úti á gongini á miðhæddini og í einum flokshøli telvaðu næmingarnir í 4. og 5. flokki ímóti hvørjum øðrum.

Eisini fingu gestirnir høvi til at vitja Tónalon, sum eru nýggju hølini hjá musikkskúlanum.

Samanumtikið, ein sera góð og hugnalig vitjan.

Fleiri myndir síggjast frá vitjanini síggjast her!